英超：我要爭前4你要追榜首 紅軍曼城半場大激鬥_東方日報

今輪英超大戰，利物浦主場硬撼曼城。「紅軍」狀態回勇，繼歐聯狂炒卡拉巴克6蛋後，上場英超以4比1大破紐卡素，火力全開，為爭入前4主場必搶。曼城若然再失分就會被阿仙奴進一步拋離，同樣冇得縮，雙方隨時一開波就駁火，再追中位數1.5球半場大。（Now 621及611周一凌晨零時30分直播）文:Mic少

上季盟主利物浦衞冕機會非常渺茫，惟有寄望打入前4，確保下季有得踢歐聯，佢哋現時排第6位，同主要競爭對手曼聯及車路士積分非常接近，必定搏盡希望盡快反超前。利物浦已逐漸重回正軌，各項賽事近4場贏3場，上仗反勝紐卡素，終於取得今年首場英超勝仗，有助振奮軍心。

域斯腳風勁順洗污名
「紅軍」3大尖刀艾基迪基、域斯及蘇保斯拉爾近期腳風非常順，尤其身價超過1億鎊嘅域斯已洗脫「水貨」污名，自從上年12月下旬對熱刺取得助攻開始，近11場交出6入球及3次助攻，屬同期創造最多入波嘅英超球員，加上利物浦近6仗上半場都有入球，有望迅速攻破曼城大門。

曼城走勢亦非常凌厲，上場英聯盃4強次回合半場已轟入3粒，完場以3比1殺退紐卡素，晉級決賽，加上王牌艾寧夏蘭特只係下半場中段入替，擺明留力今晚搏殺。「藍月亮」踢法搶韁，近5仗上半場總入球全開2球或以上，利物浦防線唔算穩陣，未必擋到佢哋強攻，半場合演入球騷機會甚濃。