英超：4連勝魔性返晒嚟 曼聯弗爆客W扑錘_東方日報

今個星期英超有快車，今日焦點當然係爭取聯賽5連勝嘅曼聯作客韋斯咸。「紅魔鬼」卡域克帶領之下取得4連勝，球隊愈戰愈勇，連贏曼城同阿仙奴唔係講笑，「錘仔幫」後防太差，經常入埋唔夠輸，今場捧客勝。（Now 621及611周三凌晨4時15分直播）文:渡邊年

卡域克上任後確實為曼聯重拾「魔性」，如果有睇上場對熱刺嘅比賽，第1球入波個角球攻勢，嗰種靚組織，之前喺魯賓艾摩廉同坦哈格麾下甚少見到，唔少曼聯球迷都話，喺「焚城、拆廠、劫富、食刺」之後，呢場係5連勝「扑錘」。

事實上，曼聯喺呢4場勝仗，每場最少射入對手2球，隊長般奴費南迪斯當弗，上仗成功為球隊創造第200個英超入波。今場仲有個紀錄等緊呢名葡萄牙中場，今季佢已經貢獻咗8個英超作客助攻，同2001/02年球季嘅傑斯共享呢個單季紀錄，如果今場佢又有助攻，就可以獨霸呢個勁揪紀錄。

韋斯咸防線穿大窿
「錘仔幫」上仗2比0擊敗般尼，近4戰獲得3勝1負，喺護級路上確實幫助不少，但佢哋仍然排緊喺尾3，主因係球隊後防實在太曳，撇除上仗鬥般尼，韋斯咸各項賽事對上22場，全部都未能保持不失，加上中堅圖迪保前仗對車路士，直接領紅牌要繼續停賽，整體實力進一步下降，即使前鋒森馬維當弗，連續5場有波入，預計條後防頂唔住曼聯，入埋都唔夠後邊輸，客勝可以放心捧場。