英超：馬年將帥運程逆轉好睇過戲_東方日報

恭喜發財！今年英超爭霸超激烈，真正好睇過戲，正式踏入馬年，眾將帥運程逆轉，初五起仲會上演連場大戰，英超形勢又會唔會有咩改變？

高爾彭馬 要避免受傷
高爾彭馬同馬真係好有緣，唔單止譯音有個馬字，佢都係喺馬年出世。不過屬馬人士踏入本命年犯太歲，兩大凶星「劍鋒」、「伏屍」，會影響肖馬人士嘅情緒，同時亦容易受傷，尤其佢咁鍾意上腳，一對住啲硬淨球隊好易出事，所以彭馬嚟緊真係要特別注意喇，踢法簡單啲好啲，簡單就是美嘛。

約基利斯 靠跑動搵食
阿仙奴今季成績驕人，季前加盟嘅前鋒約基利斯，絕對係功臣之一。約基利斯1998年出世，肖虎，今年太歲三合，運程中上，不過由於冇吉星幫手，所以凡事都要親力親為，不過相信都難唔到約基利斯嘅，呢位瑞典國腳一向勤於走位，有時入唔到波都幫到手開路，熱刺防線真係要打醒十二分精神呀！

夏蘭特 只求keep住水準
夏蘭特近期入波當食生菜，幫曼城撻番着連勝mode；不過踏入馬年，肖龍嘅朋友有凶星「血刃」、「浮沉」，令整體運勢平穩、難有突破，好彩同時有吉星「天解」、「解神」及「八座」拱照，有助抗衡凶星，肖龍嘅夏蘭特只要keep住個水準，相信曼城嘅攻擊力唔會有太大問題嘅。

域斯 勢成新紅軍核心
隨住逐漸適應紅軍體系，域斯近期表現已愈嚟愈好，2003年出生嘅域斯肖羊，今年「太歲相合」，萬事穩定。由於肖羊者於馬年有吉星「太陽」加持，人緣運比起2025年更勝一籌，容易有貴人輔助，同時亦會令肖羊嘅朋友喺事業上地位提升。盛傳沙拿今夏離隊，域斯大有機會成為利物浦新核心。

根夏多貴人 唔愁冇士哥
曼聯雖然換帥冇耐，不過都唔會影響馬菲奧斯根夏嘅地位，因為呢位巴西國腳今季交足貨，況且兔係馬年最旺嘅生肖，今年除咗係肖兔朋友嘅「天喜」桃花年，亦係財運年，仲有「天德」、「福星」、「福德」拱照，凡事逢凶化吉兼有貴人扶助，根夏身邊有麥比奧莫、阿密特迪亞路同般奴費南迪斯等支援，唔愁冇士哥啦。