澳職：火力全開追擊麥克阿瑟 噴射機強勢沒法擋_東方日報

今日下午澳職好戲碼，「1哥」紐卡素噴射機主場迎戰FC麥克阿瑟。噴射機弗到漏油，贏到開巷，遇上啱啱亞冠二出局嘅麥克阿瑟，必定乘勝追擊，捧主勝贏到盆滿缽滿。（無綫myTV SUPER周日下午3時直播）文:法達斯維

講到澳職最弗球隊，非噴射機莫屬，呢支季初表現低迷嘅球隊，踏入2026年全面撻着，自元旦日開始聯賽7連勝，乘住奧克蘭FC等球隊失分，一舉殺上榜首。噴射機最煞食係進攻，17輪聯賽已攻入40粒，火力冠絕群雄，拉治蘭路斯、基斯泰萊、艾利阿當斯等輪流發威，射手拉治蘭路斯更喺近7仗入5球，腳風順到冇朋友。

攻守失衡困擾客軍
另邊廂，麥克阿瑟狀態低迷，唔單止近6場聯賽贏得1場咁大把，近日喺亞冠二16強兩回合計以2比4不敵曼谷聯，慘遭淘汰，信心跌到落谷底。佢哋最大問題係防線穿窿，17輪聯賽入24粒但失番23球，明顯係攻守失衡，點樣頂得住噴射機嘅強大攻力呢？兩隊一高一低，寧買當頭起，既然噴射機咁旺，主勝不容錯過。