英超：星將盡出入多幾粒先穩陣 阿仙奴重燃熱血上盤抵玩_東方日報

英超上演「北倫敦打吡戰」，熱刺主場對阿仙奴。「兵工廠」近期賽和賓福特同狼隊，領先優勢所餘無幾，再唔贏波嘅話好快就會畀曼城過頭；今場對手熱刺除咗係死敵，仲係「私房菜」，事關阿仙奴近4次聯賽交手全勝，阿仙奴讓一球，上盤坐和望贏。(Now 621及611周一凌晨零時30分直播)文:邪神

其實阿仙奴近兩場失分都有啲糊裏糊塗，兩場都係先入波，但最終都守唔住，其中上場對狼隊更一度領先兩球，頂到補時4分鐘失守，依家主帥阿迪達最驚嘅係球員愈踢愈冇信心，而最佳解決辦法就係領先後唔好停，繼續搶攻入多幾個「燕梳球」。

以「兵工廠」攻力，布卡約沙卡同李安度杜沙特可傳可射，約基利斯喺最前專心入波，仲有加比爾捷西斯同伊比爾治伊斯隨時候命，前面入波絕對冇問題，而且今場係「北倫敦打吡戰」，主場嘅熱刺唔會死守，雙方對攻之下，阿仙奴更容易搵到入球機會。

熱刺易帥打硬仗
睇番熱刺對上一次聯賽贏波，已經要數到去年底贏水晶宮嗰場，踏入2026年，只係曾經喺歐聯贏過波，近8場聯賽僅得4和4負未贏過，包括近期對曼聯同紐卡素吞2連敗，導致主帥法蘭克被炒，今仗賽前宣布委任杜陀領軍，首場就要面對宿敵阿仙奴，搶分機會實在相當渺茫；今場捧「兵工廠」上盤之餘，仲可以考慮玩埋同場過關「阿仙奴勝&總入球多於（3.5）球」，齊齊發個新年財。