沙職：希拉爾如虎添翼搶半W_東方日報

沙職爭冠你追我逐，啱啱失落榜首嘅希拉爾，今場作客前列分子艾塔亞文，不容再有任何閃失。希拉爾上輪被伊蒂哈德逼和，痛失榜首位置，今場力爭重返勝軌，佢哋實力超班，近期經常憑強大火力先發制人，今場博半場客勝好路。（on.cc東網周三凌晨3時直播）文:工廠仔

希拉爾今季表現穩定，至今仍然係沙職唯一不敗之師，佢哋喺冬季轉會窗大事增兵後，實力如虎添翼。自法國前鋒賓施馬加盟後，佢同馬爾甘、沙廉艾達沙尼嘅鋒線合作無間，希拉爾踢法亦更進取，近3場聯賽都喺半場領先。

希拉爾上場意外失分後，依家形勢落後，今場急於求勝，肯定一開波就搶攻，尤其希拉爾今季作客以攻代守，10場聯賽作客攻入30球，而且佢哋3日後又要作客艾沙比，當然想盡快領先，避免陷入苦戰影響體力。

艾塔亞文狀態勁曳
艾塔亞文雖然位處前列，但同前4位置距離愈嚟愈遠，士氣低迷，佢哋近期狀態極差，對上7場聯賽只係贏過1場，上場對住艾費哈都輸2比3，咁嘅狀態難對希拉爾造成威脅。翻查兩隊之前4次交鋒，希拉爾全部都喺上半場領先，有「格食格」味道，一於再追半場客勝。