英超：阿仙奴車仔打吡大火併_東方日報

瞄準關鍵3分搏到盡
英超「倫敦打吡」爆發！全力衝冠嘅阿仙奴近期備受壓力，好在上輪大勝熱刺重振雄風，今仗返主場出戰仍不容有失，食住個勢肯定主動出擊；車路士要搶前4位置亦不敢怠慢，自知防守唔掂就以攻代守，經常出現駁火好戲，中位數2.5球嘅入球大值得捧場。（Now 621及611周一凌晨零時30分直播）文:工廠仔

「1哥」阿仙奴早前接連失分，受到曼城步步進逼，上場喺「北倫敦打吡」作客熱刺放開嚟踢，領先之後仍然不斷進攻施壓，最終拎到4比1漂亮勝仗。吸取之前領先後歎慢板失分嘅教訓後，預料「兵工廠」踢法將會更主動同進取。瑞典射手約基利斯最近上力，近5場聯賽轟入5球，令阿仙奴更有搶攻本錢。

鋒將成籮主場多入波
阿仙奴鋒線人才濟濟，德國前鋒夏維斯傷愈候命，布卡約沙卡、加比爾馬天尼利、李安度杜沙特同加比爾捷西斯等要競逐正選，邊個落場都肯定搏命。「兵工廠」近5場賽事，有4場開3球或以上，加上喺酋長球場近5仗攻入13球嘅強大火力，足以打爆車路士防線。

以前4名為目標嘅車路士，新帥羅仙尼亞自知防守能力單薄，近期踢法更偏向進攻，最近4場賽事都先開紀錄，對上5場聯賽有4場開4球或以上。「車仔」今場有左閘古古列拿受傷，以及中堅韋斯利科芬拿停賽，後防更見空虛，以攻代守係佢哋唯一出路，今場打吡駁火味道極濃，2.5球入球大抵玩。