歐聯：R1和波信心提升 利華有得鍊半細頂住仙_東方日報

歐聯16強「廠佬大戰」Part2，「兵工廠」阿仙奴主場再戰「藥廠」利華古遜，首回合阿仙奴憑倒戈嘅夏維斯12碼建功扳平1比1，逃過輸波厄運，不過上場交手已證明，「兵工廠」無法取得壓倒性優勢，利華古遜首回合表現不落下風，球員信心大增，佢哋喺歐聯偏向保守，近7場歐聯作客6次半場開1球或以下，首選1.5球半場細。（Now 638周三凌晨4時直播）文:邪神

當日歐聯抽籤後，全世界都認為阿仙奴抽到上上籤，可以輕鬆入4強，不過事實並唔係咁，利華古遜絕非魚腩，首回合所見，雖然「兵工廠」控球比例稍多，但雙方攻門數據接近，利華8射3中，阿仙奴7射3中，大家只係平起平坐。

阿仙奴唔敢谷吼埋半和
角球入波係阿仙奴今季一大殺着，往往喺戰況膠着時好使好用，不過剃人頭者人亦剃其頭，佢哋喺歐聯16強首回合，就係畀利華古遜角球戰術攻破大門，下半場一開波，中堅安特列治楔遠柱空位頭槌破網，好在臨完場馬度基博到12碼，「兵工廠」憑夏維斯操刀射入先至追成平手，今場再決高下。

返到聯賽，阿仙奴剛以2比0贏愛華頓，加上曼城失分，現時喺英超領先9分，士氣高昂，不過利華古遜都唔差，喺德甲1比1賽和班霸拜仁慕尼黑，近6場保持1勝5和不敗走勢，作客酋長球場未驚過；預計今場阿仙奴冇咩優勢，而且雙方都會小心翼翼避免先失波，磨磨下好快就踢完半場，捧半場細之餘，半場和都玩得過。