附加賽：到美國踩場避重就輕 巴西半和有辦法_東方日報

今晚國際賽熱身賽上演1998年世界盃決賽翻版，巴西大戰法國。兩軍千里迢迢飛去美國交手，目的梗係為世盃決賽周「踩場」，勝負只屬次要，加上歐洲聯賽進入衝刺階段，兩邊球星難免比較錫身，最緊要唔好受傷，翻查近6次對賽上半場全部打和，一於再追半場和。（周五凌晨4時開賽）文:Mic少

球星舟車勞頓更錫身
巴西主帥安察洛堤今次點兵好正路，雲尼斯奧斯祖利亞、拉芬夏比洛尼、馬菲奧斯根夏及卡斯米路等主力悉數入選，陣容星光熠熠，不過呢班球星由歐洲遠赴美國踢熱身賽，難免舟車勞頓，尤其歐洲聯賽殺入直路，估計今仗唔會搏得太盡。安察洛堤向來講求四平八穩，昔日「森巴足球」侵略性盡洗，近2場熱身賽僅小勝塞內加爾2比0，同打和突尼亞西1比1，唔好期望佢哋會主動搶攻。

法國陣容同樣強大，有基利安麥巴比、奧士文尼迪比利、米高奧利斯及卓基等人助陣，但同樣要搭長途機去美國，加上下周一凌晨仲要對哥倫比亞，賽程相當緊湊，更要謹慎分配體力，領隊迪甘斯排陣隨時留有一手。另外王牌麥巴比始終剛傷愈冇耐，自然更錫身免觸傷舊患，既然兩隊戰意成疑，半場和波機會甚高。