附加賽：旗鼓相當烏克蘭瑞典追半和_東方日報

上屆同樣於世界盃外圍賽附加賽決賽出局嘅烏克蘭同瑞典，今屆要提早一輪決定命運，今晚喺西班牙中立場「決鬥」！雙方實力旗鼓相當，論近況烏克蘭稍為佔優，不過一場過賽事，大家都唔敢亂嚟，加上近5次交手，全部開半場和，值得再追。（周五凌晨3時45分開賽）文:路西法

睇番上屆附加賽，烏克蘭先擊敗蘇格蘭，但最終不敵威爾斯無緣決賽周，至於瑞典則先淘汰捷克，決賽畀波蘭踢走。兩支命運相若嘅球隊今次碰頭，睇對賽都係勝負難料，近5次交手2次打和，其餘3次分出勝負都只係1球上落，今場睇嚟都係唔想輸多過想贏。

樸達風格穩陣行前
烏克蘭喺分組賽表現平穩，只輸過畀法國，其餘比賽對住冰島同阿塞拜疆應贏則贏，踢法謀定而後動，先做好防守，再於下半場發動猛攻，近5仗4次開半場和。相反瑞典踢到不知所謂，雖然擁有約基利斯、安東尼艾蘭加等星級鋒將，但整體演出令人失望，6場分組賽對住瑞士、科索沃同斯洛文尼亞，只得2和4負未贏過，只係靠之前歐國聯成績「掹車邊」踢附加賽。

瑞典足總喺舊年10月炒咗主帥湯馬臣，搵樸達接掌球隊，喺佢領軍下，最後兩場外圍賽1和1負，但至少半場冇輸畀對手，兩場都開半和，相信今場會繼續呢種穩陣踢法，一於再追半場和。