國際賽：葡萄牙冇C朗搶W更爽_東方日報

周日朝早國際熱身賽，墨西哥同葡萄牙兩支世盃球隊展開交鋒。葡萄牙今場遠征北美，雖然王牌球星C朗拿度受傷缺陣，不過葡萄牙已經擺脫「1人球隊」時代，唔少球星都能夠擔起大旗，戰鬥力更勝從前。墨西哥今場殘陣出擊，葡萄牙贏波在望，客勝值捧！

（周日早上9時開賽）文:工廠仔

葡萄牙今次點兵，有C朗同貝拿度施華因傷落選，不過呢支歐國聯冠軍喺領隊馬天尼斯帶領下，逐步擺脫個人色彩，更加着重整體戰，魯賓尼維斯、域天拿、般奴費南迪斯都能夠獨當一面，攻守節奏比過往更流暢，上場就喺C朗停賽下，以9比1狂勝阿美尼亞，加上葡萄牙近4場作客獲3勝，今場贏面極高。

墨西哥殘陣頂唔住
墨西哥係今屆世盃東道主，唔需要踢外圍賽，過去1年只係靠熱身賽保持狀態，最慘係今次有唔少主力缺陣，中場艾臣奧馬艾華利斯、射手辛迪亞高基文尼斯、路爾斯洛慕等都因傷未有入選，戰鬥力大受削弱，就算有主場之利，相信都擋唔住強勢嘅葡萄牙，放心捧客勝。