國際賽：入初選名單最後餐士 德國邊緣人大作戰_東方日報

今晚國際熱身賽焦點戰，德國喺主場迎戰非洲球隊加納。德國將會喺5月中公布世盃大軍初選名單，意味今場係一班「邊緣人」爭取表現嘅最後機會，可唔可以入選世盃名單睇呢鋪，對住「黑星」必定搏晒命火力全開，3.5球大盤捧得過。（周二凌晨2時45分開賽）文:法達斯維

德國足總日前證實，佢哋會喺5月12日公布一份出戰6月世界盃嘅初選名單，即係喺德甲煞科前幾日，從中再挑選26人作終極名單，並於6月頭遞交畀國際足協。其實去到呢一刻，相信主帥拿高斯文揀人已經心中有數，只係個別後備位置仲諗緊點取捨，安祖路史迪拿、安東史達治、丹尼斯烏達夫、奇雲舒哈迪及馬歷泰奧等一眾「邊緣人」，要靠今場表現爭取拿帥歡心，必定會施展渾身解數，力求先搭上初選名單尾班車。

講到德國就不得不提中場域斯，呢位利物浦球星上仗險勝瑞士4比3一役，交出2個入波同2次助攻，表現可謂光芒四射，完全主宰球隊進攻。事實上域斯雖然喺「紅軍」演出時好時壞，但一返到國家隊即刻生猛晒，核心地位毋庸置疑。而且「日耳曼兵團」喺主場慣性採取主動，近3次主場出擊狂轟13粒，全開4球或以上，唔使驚佢哋冇波入。

加納防守曳凶多吉少
另邊廂，加納早已今非昔比，雖然同屬世盃決賽周分子，但近3場「拍跳」，先後輸畀日本、南韓同奧地利，其中上仗對住奧地利更輸夠五個一皮，防守完全唔掂檔，面對攻力更強嘅德國，睇怕凶多吉少。唯一可取係有曼城翼鋒安東尼施美安擔大旗，對住啱啱失咗3粒嘅德國防線，可能搵到着數，捧入球大最上算。