日職聯：主場弗到暈勝利船Ｗ至稱心_東方日報

日職百年構想聯賽西區賽事，榜首神戶勝利船主場迎戰清水心跳。勝利船近況出色，近7場5勝2和，主場更加醒神，今季6次主場錄得5勝1和，屬贏波保證；至於心跳今季8戰僅得2勝，踢法較為被動，比較之下，勝利船主場睇高一線，捧主勝。（無綫myTV Super周三晚上6時直播）文:邪神

勝利船今季攻守兼備，8場聯賽攻入13球，而且攻擊點分散，分別由10名球員入波，令對手防不勝防，表現最突出係累積攻入3球並交出2次助攻嘅正箭頭小松蓮，光芒蓋過老牌射手武藤嘉紀；再睇該隊主場成績，除咗今季錄得5勝1和，再數埋上季原來已經保持跨季主場17場不敗，累計成績12勝5和，主場威力唔講得笑。

心跳５訪神戶輸到慌
清水心跳成績略為遜色，今季8戰2勝5和1負，和波後互射12碼成績2勝3負，整體攻守表現亦不及勝利船，進攻集中喺南韓前鋒吳世勳同北川航也兩人身上，合共攻入5球，勝利船只要派人嘜實佢兩個，心跳就惡唔出樣。再睇對賽往績，勝利船近5次主場對心跳，共獲4勝1和未嘗敗績，相信今場都唔例外，主勝有計。