歐聯：傷兵滿營 阿仙奴陷信心危機好易出士_東方日報

歐聯8強首回合，葡超勁旅士砵亭主場迎戰阿仙奴。士砵亭今屆歐聯主場出擊非常醒神，強如巴黎聖日耳門去到佢哋地頭都要輸波；阿仙奴依家出現信心危機，傷兵滿營下更加隱憂重重，今場唔輸已經收貨，遑論要作客讓波，讓球主勝（+1）值得捧場。（Now 638周三凌晨3時直播）文:臻贏特

士砵亭主場惡到爆
阿仙奴雖然喺聯賽階段8戰全勝，不過16強首回合作客利華古遜，幾經辛苦先靠12碼追平1比1，次回合返主場先至贏波晉級，似乎踏入淘汰賽客場表現畏首畏尾，加上近2場先後喺英聯盃決賽飲恨、英足盃8強出局，連失兩個爭冠機會，球員信心受到打擊，作客先求不敗都係正常。何況「兵工廠」目前傷兵眾多，中堅加比爾馬加希斯上場傷出，今仗上陣成疑，伊比爾治伊斯、軒卡派爾等傷兵仲要繼續休養，戰鬥力大打折扣。

士砵亭一向都係「主場龍」，今屆歐聯5次喺自己地頭唔單止保持不敗，而且全部贏晒，包括16強面對波杜基林特，首回合作客慘吞3蛋嘅劣勢下，次回合返主場連轟5球戲劇性晉級，主場威力可見一斑。

士砵亭喺3年前歐霸盃16強曾經同阿仙奴交過手，喺兩回合都打和情況下，最終靠互射12碼出線，心理上有優勢，今場受讓相當抵玩。