亞冠：4強首回合飛腳曼谷和味濃_東方日報

亞冠二進入白熱化階段，4強首回合大阪飛腳迎戰曼谷聯，睇下邊隊成為東亞區王者。大阪飛腳今季喺雙線作戰下，做咗「和波專家」，踏入2026年後有超過6成比賽都係打和，今場對住踢法硬淨兼專注防守嘅曼谷聯，未必可以咬得入，隨時又係以「和」為貴。（周三晚6時開賽）文:工廠仔

大阪飛腳目前喺日職西區排緊第2位，不過佢哋9場聯賽只係贏過3場，當中有5場係打和。唔好以為12碼賽制令佢哋更樂於和波，因為飛腳喺亞冠二都有同樣情況，8強對拉查布里兩回合法定時間都打和1比1，近4場亞冠二1勝3和，總計今年13場比賽有8場打和，踢法偏向穩陣。

客隊硬淨但求不敗
泰超勁旅曼谷聯，晉級過程先後淘汰FC麥克阿瑟同淡賓尼流浪，兩輪都係「主勝客和」，今場作客會以不敗為大前提，希望次回合返主場再決勝負。曼谷聯近期都係和得，近7場賽事2勝5和，而且近4場作客全部打和，今場一於再追和局。